पोखरामा बेलुन विस्फोट हुँदा घाइते भएका उपप्रधानमन्त्री तथा अर्थमन्त्री विष्णु पौडेल र पोखरा महानगरपालिकाका मेयर धनराज आचार्यको स्वास्थ्यमा सुधार आएको छ ।
आइतबार कीर्तिपुर अस्पतालका निर्देशक डा. किरण किशोर नकर्मीले विज्ञप्ति जारी गरी अर्थमन्त्री पौडेल र मेयर आचार्यको स्वास्थ्य सुधारोन्मुख रहेको जानकारी दिएका हुन् । निर्देशक नकर्मीले अर्थमन्त्री पौडेल र मेयर आचार्यको स्वास्थ्य अवस्था सामान्य भए पनि संक्रमण हुने भएकाले भेटघाट भने बन्द गरिएको बताएका छन् ।
'हाललाई अवस्था सामान्य भएता पनि संक्रमण हुने भएको हुँदा हाललाई भेटघाट अर्को सूचना नआएसम्म पूर्ण रूपमा बन्द गरिएको छ,' विज्ञप्तिमा भनिएको छ । अस्पतालले अर्थमन्त्री पौडेल र मेयर आचार्यको घाउको अवस्थाबारे ड्रेसिङ भएपछि अध्यावधिक गरिने बताएको छ ।
