काठमाडौं । नेपालबाट हङकङ उडानका क्रममा हङकङको ध्वजावाहक क्याथे प्यासिफिक एयरवेजको जहाजका यात्रुलाई खाद्य विषाक्तता (फुड प्वाइजन) हुनुको कारण नेपाली खाना नभएको पुष्टि भएको छ । २४ र २५ पुसमा काठमाडौंबाट हङकङ गएको क्याथे प्यासिफिकको जहाजका दुई उडानमा गरी ४३ यात्रुलाई फुड प्वाइजन भएको थियो ।
नेपालबाट हङकङ उडेका यात्रुलाई फुड प्वाइजन भएपछि खाद्य तथा गुण नियन्त्रण विभागले वरिष्ठ खाद्य अनुसन्धान अधिकृत सुमन धितालको संयोजकत्वमा छानबिन समिति गठन गरेको थियो । समितिले बिहीबार प्रतिवेदन सार्वजनिक गर्दै उडान कम्पनीकै क्याथे प्यासिफिक क्याटरिङ सर्भिसले तयार गरेको खानाका कारण फुड प्वाइजन भएको जनाएको हो ।
प्रतिवेदनका अनुसार सुरुमा २८ जनामा फुड प्वाइजन भएको भनिए पनि हङकङबाट ४३ जनालाई फुड प्वाइजन भएको जानकारी आएको समेत उल्लेख छ । कोरोनापछि उडान रोकेको क्याथेले असोज २०७९ देखि नेपालमा पुनः उडान थालेको थियो ।
