बहुप्रतीक्षित नेपाली फिल्म ‘एक्टरः टेक वन’ आजदेखि विधिवत् रुपमा प्रदर्शनमा आएको छ । अदालती प्रकृयाका कारण सिनेमा हलहरूले आज बिहानैदेखि शो नखुलाए पनि दिउँसोका शोहरु भने खुलेका छन् । शुक्रवार बिहान अदालतबाट मुद्दा फिर्ता गरिएसँगै फिल्म देशव्यापी रिलिजमा आएको हो ।
नाम मिलेको विवादको विषयलाई लिएर ‘एक्टर’ तथा ‘एक्टरः टेक वन’ फिल्मका निर्माताबीच बिहीवार भएको सहमतिपछि ‘एक्टरः टेक वन’ निर्माताले बिहीवार पत्रकार सम्मेलन गर्दै शुक्रवारदेखि रिलिज हुने जनाएका थिए । गत सोमवार यो फिल्मको ग्राण्ड प्रिमियर आयोजना भएको थियो, जसमा फिल्मको खुलेर प्रशंसा गरिएको थियो ।
यो फिल्ममा प्रदीप खड्का, आना शर्मा, दिव्या रायमाझी, राजबल्लभ कोइराला, दिव्य देव, सृजना अधिकारी, उषा रजक, सुशील सिटौलालगायतका कलाकारहरूको प्रमुख भूमिका रहेको छ । यो फिल्मको स्क्रिप्ट आकाश बराल र राजन भुसालले लेखेका हुन् । यस अधृत फिल्म्स् र अ मोती फिल्मको संयुक्त प्रस्तुति रहेको यो फिल्मका निर्माता थमन कुमार भण्डारी, क्रियटिभ प्रोड्युसर मोती कार्की र सह–निर्माता अनीश भुसाल रहेका छन् ।
