काठमाडौं । काठमाडौंको कीर्तिपुर नगरपालिकास्थित चोभारमा आगलागी भएको छ । मंगलबार बिहान कवाडी संकलन केन्द्रमा आगलागी भएको हो ।
कवाडी संकलन केन्द्र र बंगुरपालन गरिएको ठाउँमा आगलागी भएको र अझै आगो नियन्त्रणमा लिन नसकिएको काठमाडौं महानगरपालिकाका सहायक निरीक्षक वसन्तकुमार श्रेष्ठले बताए । आगलागीको जानकारी हुनेबित्तिकै महानगरको टोली पुगेर नियन्त्रणमा लिने प्रयास गरिरहेको उनले जानकारी दिए ।
आगलागी भएको स्थानमा जस्तापाताका टहरा बढी भएका कारण नियन्त्रणमा लिन नसकिएको उनले बताए । स्काभेटर मगाएर जस्तापाता हटाउने र आगो नियन्त्रणमा लिने प्रयास गरिरहेको उनले जानकारी दिए ।
“यहाँ कवाडी, बंगुरपालन गरेको रहेछ । हामीले थाहा पाउनेबित्तिकै आएर आगो नियन्त्रण लिँदै छौँ । नियन्त्रण पूरा भएको छैन,” उनले भने, “लगभग आधाआधाजति नियन्त्रणमा आइसकेको छ । जस्ता भएको कारणले निभाउन अलि अफ्ठ्यारो छ । स्काभेटर बोलाएर निभाउने प्रयास गर्दै छौँ । आधा नियन्त्रणमा आएको छ । तीनवटा दमकल आएको छ । तीनवटाबाट निभाउने प्रयास भइरहेको छ ।” नेपाल प्रहरी, सशस्त्र प्रहरी, स्थानीय बासिन्दालगायत मानिस र निकाय मिलेर आगो निभाउने प्रयास भइरहेको छ । न्युज एजेन्सी नेपाल
