रुकुम । रुकुम पश्चिममा छोराले बुबाको हत्या गरेका छन् । जिल्लाको आठबीसकोट नगरपालिका–१०, घारीखोलाका २० वर्षीय वीरबहादुर खत्रीले ५० वर्षीय बुबा दर्वे खत्रीको हत्या गरेका हुन् । आइतबार साँझ वीरबहादुरले चक्कु प्रहार गरेर आफ्नै बुबाको हत्या गरेको जिल्ला प्रहरी कार्यालयका सूचना अधिकारी प्रहरी निरीक्षक ऋषि पाठकले जानकारी दिए ।
उनका अनुसार बुबाको हत्या गर्ने वीरबहादुर फरार छन् । फरार वीरबहादुरको खोजीका लागि इलाका प्रहरी कार्यालय आठबीसकोटका प्रहरी निरीक्षक गणेश खनालको कमान्डमा १० प्रहरी परिचालन गरिएको प्रहरी निरीक्षक पाठकले जानकारी दिए । घटनाको कारण भने नखुलेको प्रहरीले जनाएको छ । रासस
