जेठ, ५, काठमाडौं । कुनै पनि व्यवसायिक छाता संगठनमा संलग्न नरहेका उद्योगी व्यवसायीले सवारी पासकालागि सिधै सम्बन्धित विभागमा निवेदन दिन पाउने भएका छन् ।
उद्योगीको छाता संगठनको सिफरिसमा मात्रै पास बितरण गर्ने निर्याणयले स्वतन्त्र र साना उद्योगी व्यवसायीलाई अप्ठ्यारो परेको गुनासो पछि उद्योग मन्त्रालयले यस्तो निर्णय गरेको हो ।
मन्त्रालयको सोमबार बसेको बैठकले यस्तो निर्णय गरेको मन्त्रालयका उपसचिव बिरेन्द्र बस्नेतले जानकारी दिए ।
उद्योगीहरुलाई भेदभाव गर्न नभई पास वितरण कार्यक्रममा हुने भिडभाड नियन्त्रणकालागि मात्रै त्यस्तो व्यवस्था गरिएको मन्त्रालयले प्रष्ट पारेको छ ।
सरकारले यसअघि ४२ प्रकारका उद्योगहरु सञ्चालनमा ल्याउने निर्णय गरेको थियो । ति उद्योगहरुले नेपाल उद्योग वाणिज्य महासंघ, नेपाल चेम्बर अफ कमर्श र नेपाल उद्योग परिसंघको सिफारिसमामात्रै पास पाउने व्यवस्था गरिएको थियो ।
ठूला उद्योगीहरुको संगठनले सिफारिस गर्नु पर्ने भए पछि नेपाल राष्ट्रिय व्यवसायी महासंघले आपत्ति जनाएको थियो । राज्यले सबै उद्योगलाई समान किसिमले व्यवहार नगरेको भन्दै महासंघले आपत्ति जनाएको थियो ।
