काठमाडौं । नेपाल प्रिमियर लिगका लागि फ्रेन्चाइज टिम सुदूरपश्चिम रोयल्सको आइकनिक खेलाडीमा वसन्त खत्रीलाई छनोट गरेको छ । रोयल्सले आफ्नो आइकनिक खेलाडीका रूपमा अलराउन्डर वसन्त खत्रीलाई छनोट गरेको हो । ट्यालेन्ट हन्टबाट सुदूरपश्चिमले सुरुमा खत्रीसहित आयुब चन्द, अभिषेक पाल, वसन्त सिंह कार्की, भूपेश जोशी, धर्मराज जोशी, सुसिल रावल र टेक रावतलाई छानेको थियो । यीमध्ये खत्रीलाई आइकनिक खेलाडीका रूपमा टिममा भित्राएको हो ।
सुदूरपश्चिम रोयल्सको मार्की खेलाडी सुदूरपश्चिम प्रदेशकै दीपेन्द्रसिंह ऐरी छन् । मेन्टरमा अष्ट्रेलियाका ब्राड हज र मुख्य प्रशिक्षकमा जगत टमाटा छन् । रोयल्सले आफ्नो कोटाका चार विदेशी खेलाडीलाई पनि अनुबन्ध गरिसकेको छ । सुदूरपश्चिम रोयल्सले ब्रान्डन मक्मलेन (स्कटल्यान्ड), सेफ अलि जेब (इंग्ल्यान्ड), स्कट कुगेलेइन (न्युजिल्याण्ड) र रोहन मुस्तफा (यूएई) लाई टिममा समावेश गरेको छ ।
त्यस्तै, टिममा आरिफ शेख, अभिनास बोहोरा, विनोद भण्डारी , अर्जुन कुमाल, खडक बोहोरा, इशान पाण्डे, नरेश बुढाऐर, भोजराज भट्ट, नरेन साउद र अमित श्रेष्ठ छन् ।
