काठमाडौँ । मनसुन फेरि सक्रिय भएकाले काटिसकेको धान बाली खेतमा नछोड्न आग्रह गरिएको छ । राष्ट्रिय कृषि वातावरण अनुसन्धान केन्द्रका प्राविधिक अधिकृत तथा कृषि मौसमका जानकार रामेश्वर रिमालले काटिसकेको धान बाली खेतमा नछोड्न आग्रह गरेका हुन् ।
अगौटे धान बाली भित्र्याउने समय भएकाले मेसिनको प्रयोग गरी छिटो भित्र्याइ हाल्न उनले सुझाएका छन् । काटेको धान खेतमा नछोड्ने, केही काँचोमै काटी सकेको धान चिउरा बनाउन सकिने रिमालले बताएका छन् ।
यस्तै, तरकारीको बीउ छर्दा माटोको ड्याम बनाएर, प्लास्टिकले टनेल बनाएर छर्न आग्रह गरिएको छ । महाशाखाले विशेष मौसम बुलेटिन सार्वजनिक गर्दै वर्षाले विशेषतः कृषि क्षेत्रमा असर पर्ने देखिएकाले कृषि कर्म सुरु गर्नुभन्दा अगावै अद्यावधिक मौसम जानकारी तथा पूर्वानुमान नियमित हेर्न अनुरोध गरेको छ ।
