काठमाडौँ । युवा तथा खेलकुद मन्त्री विराजभक्त श्रेष्ठले स्काउट समय सापेक्ष हुन जरुरी रहेको बताएका छन् । बुधवार नेपाल स्काउटको ७३ औँ स्थापना दिवसको अवसरमा बोल्दै श्रेष्ठले २१ औँ शताब्दीमा स्काउट कस्तो हुनुपर्छ भन्ने हिसाबले अघि बढ्न आवश्यक रहेको बताएका हुन् ।
उनले स्काउट समय सापेक्ष बनाउँदा आफ्नो धर्म र मर्म बिर्सिनु नहुने बताए । उनले भने, ‘स्काउट समय सापेक्ष पनि हुनुपर्छ । २१ औँ शताब्दीमा स्काउट कस्तो हुनुपर्छ । यो भन्दै गर्दा स्काउटको मूल्य मान्यताहरू नबिर्सीकन, आफ्नो जरा नबिर्सीकन । धेरै जसो संस्थाहरू समय सापेक्ष हुने क्रममा आफू को हो ? र केका लागि स्थापना भएको पनि बिर्सिने चलन छ । तर स्काउटले २१ औँ शताब्दी सापेक्ष हुने तर आफ्नो जरा नबिर्सीकन, आफ्नो माटो नबिर्सिने पनि हुनुपर्छ । अबको आवश्यकता भनेको डिजिटल लिट्रेसी पनि हो ।’ उनले स्काउटले दिगो विकासको लक्ष्य प्राप्तिका लागि स्काउट राम्रो संगठन भएको बताए ।
