जेठ ९ काठमाडौं । आगामी असारको पहिलो साता काठमाडौंमा १२औं संस्करणको ‘नेपाल–अफ्रिका फिल्म फेस्टिभल–२०२४’ आयोजना हुने भएको छ ।
कलेज अफ जर्नालिजम एण्ड मास कम्युनिकेशन (सीजेएमसी) र विलक्षण क्रियसनको आयोजना तथा चलचित्र विकाश बोर्डको सह–आयोजनामा हुने महोत्सवको तयारी अन्तिम चरणमा पुगेको सीजेएमसीकी प्रिन्सिपल डा. मञ्जु मिश्रले जानकारी दिनुभयो ।
महोत्सवका लागि यसपटक १५ भन्दा बढी अफ्रिकी मुलुकका चार दर्जन भन्दा बढी अफ्रिकन फिल्म, सर्ट फिल्म तथा वृत्तचित्र प्राप्त भएका छन् । यीमध्ये बढीमा एक दर्जन अफ्रिकी फिल्मलाई समावेश गराईने भएको छ । महोत्सवमा प्राप्त अफ्रिकन फिल्महरुलाई अहिले निर्णायक टिमले हेरिरहेको छ ।
‘हामीले नेपाल र अफ्रिकाको संस्कृति आदानप्रदानसँगै फिल्मबाट दुई फरक महाद्विपलाई जोड्न १३ वर्ष अघिबाट यो महोत्सव निरन्तर आयोजना गर्दै आएका छौँ । महोत्सवले अफ्रिकालाई अफ्रिकन लेन्सबाटै हेरिनु पर्छ भन्ने हाम्रो उद्देश्य रहेको छ ।’ महोत्सवको अध्यक्षसमेत रहनुभएकी अध्यक्ष डा. मिश्रले भन्नुभयो ।
महोत्सवका लागि नेपालका फिल्म, सर्ट फिल्म, वृत्तचित्र, आदिवासी फिल्म र विद्यार्थी फिल्महरु समावेश गर्ने अन्तिम मिति यही १५ जेठसम्म राखिएको महोत्सव निर्देशक डब्बु क्षत्रीले बताउनुभयो ।
