काठमाडौं । कमल एक्चै निर्देशित फिल्म ‘शिरफूल’को प्रदर्शन मिति तय भएको छ । आधुनिकताले संस्कृतिमा पारेको प्रभावको कथावस्तुमा बनेको फिल्म असार ७ गते रिलिज हुने जनाइएको छ ।
‘शिरफूल’ आदिवासी जनजाति महिलाले लगाउने सुनको गहना हो । शिरमा लगाउने र फूलको आकार हुने भएकाले ‘शिरफूल’ भन्ने चलन छ । नेपाली समाजमा छोरी चेलीलाई शिरको फूलको रुपमा लिने चलन भएकोले फिल्ममा छोरीलाई विम्बको रुपमा दर्शाउन खोजिएको जनाइएको छ ।
फिल्ममा रुपा राना, राज थापा, देवराज आले, विनिता थापा, सुनिल रोका, नमिता तामाङ, पूजा गदाल, लीला गुरुङ, नीता पुन, किरण मगरको अभिनय छ ।
राजु थापा, डीपी खनाल र कृष्ण केसीको शब्द, हरि लम्साल र देवराज आले मगरको संगीत, निरोज श्रेष्ठको छायांकन र मिलन श्रेष्ठको सम्पादन छ । आशीर्वाद पुन मगर र माया छन्त्याल पुनको लगानीमा बनेको फिल्मको पटकथा र संवाद राज थापा र राजु युगिनले लेखेका हुन् ।
गीतमा तारा श्रीश, आर्जन पाण्डे, हरि लम्साल, मेलिना राई र देवराज आलेले स्वर दिएका छन् । ‘चपली हाइट’ फेम्ड अभिनेत्री मरिश्का पोखरेलको केमियो रोल छ । निर्देशक एक्चैले यसअघि ‘डेसान’ निर्देशन गरेका छन् ।
