जेठ ७ काठमाडौं । कमल एक्चै मगरको निर्देशनमा तयार भएको चलचित्र ‘शिरफूल’ आगामी असार ७ गतेदेखि प्रदर्शनमा आउने भएको छ ।
सोमबार एक पोस्टर सार्वजनिक गर्दै चलचित्रको प्रदर्शन मिति घोषणा गरिएको हो । सोहि मितिमा अभिनेत्री पूजा शर्मा अभिनीत ‘दान्भी’ र स्वर्गीय गायक भक्तराज आचार्यको बायोपिक चलचित्र ‘आचार्य’ पनि प्रदर्शनमा आउँदैछन् ।
चलचित्रमा अभिनेत्री मरिष्का पोखरेल मुख्य भूमिकामा रहेकी छिन् । ‘शिरफूल’मा रुपा राना, राज थापा, देवराज आले, विनिता थापा, सुनिल रोका, नमिता तामाङ, पूजा गदाल, लिला गुरुङ, नीता पुन, किरण मगर लगायतको अभिनय रहेको छ । चलचित्रमा राजु थापा, डिपी खनाल र कृष्ण केसीको रचना, हरि लम्साल र देवराज आले मगरको संगीत, निरोज श्रेष्ठको छायांकन र मिलन श्रेष्ठको सम्पादन रहेको छ ।
नेपाली समाजमा छोरी चेलीलाई शिरको फूलको रुपमा लिने चलन भएकोले चलचित्रमा छोरीलाई बिम्बको रुपमा बुझाउन खोजिएको बताइएको छ । आशीर्वाद पुन र माया छन्त्याल पुनको निर्माण रहेको चलचित्रमा देवराज आले मगरको कथा र राज थापा र राजु युगिनको पटकथा तथा संवाद छ । कमलले यसअघि ‘डेसान’ बनाएका थिए ।
