४ जेठ, काठमाडौं । त्रिभुवन विश्वविद्यालय केन्द्रीय क्याम्पसको स्वतन्त्र विद्यार्थी युनियन (स्ववियु)ले ‘विश्वविद्यालय विमर्श’को पाँचौं श्रृंखलामा नेपालको बजेट इतिहासबारे विमर्श गर्ने भएको छ । हरेक शुक्रबार विमर्श गरिरहेको स्ववियुले आज राष्ट्रिय योजना आयोगका पूर्व उपाध्यक्ष डा. विश्व पौडेलसँग छलफल गर्न लागेको हो ।
बजेट ल्याउने तयारी भइरहेकाले अबको केही श्रृंखला यसमै केन्द्रित हुने स्ववियु अध्यक्ष श्यामराज ओझाले बताए । उनले छलफलको स्थान निर्माण गर्न र विद्यार्थीको लागि ज्ञानको दायरा फराकिलो बनाउन विमर्श सुरु गरिएको बताए ।
उनले भने, ‘विज्ञलाई ज्ञान बाँड्न, रुचि भएकालाई गहिराइ बुझ्न र विद्यार्थीलाई राष्ट्रिय अन्तर्राष्ट्रिय विषयमा ज्ञानको दायरा फराकिलो बनाउनको लागि विमर्श सुरु गरिएको हो ।’ विमर्शबाट विश्वविद्यालयलाई आवश्यक सुझाव र कार्यान्वयनको लागि दबाबसमेत दिंदै आएको उनले बताए ।
