१८ वैशाख, पर्वत । फलेवास नगरपालिका–२ थापाठानाका ६०० घरपरिवारलाई विद्युतीय चुलो (इन्डक्सन) वितरण गरिएको छ ।
प्रदूषणरहित भान्सा र धुवाँरहित गाउँघरको विकासका लागि रोटरी क्लब अफ पोखरा फिस्टेलको सहयोगमा वडाका सबै घरधुरीलाई विद्युतीय चुलो वितरण गरिएको हो ।
नियमित बसोबास रहेका सबै घरपरिवारलाई एक/एक थान इन्डक्सन वितरण गरिएको फलेवास–२ थापाठानाका वडाध्यक्ष गङ्गानारायण श्रेष्ठले जानकारी दिए ।
ग्रामीण सामुदायिक विद्युतीकरण उपभोक्ता समितिको आयोजनामा भएको कार्यक्रमबीच रोटरी क्लब अफ पोखरा फिस्टेललगायत संस्थाको सहयोगमा विद्युतीय चुलो वितरण गरिएको थियो ।
सबै घरधुरीलाई विद्युतीय चुलो वितरण गरिएसँगै वडा नं २ लाई प्रदूषण मुक्त भान्सासहितको वडा घोषणासमेत गरिएको छ ।
वातावरणको क्षेत्रमा काम गर्ने सिलसिलामा थापाठाना गाउँमा विद्युतीय चुलो वितरण गरेको रोटरी क्लब अफ पोखरा फिस्टेलका डिष्ट्रिक गभर्नर नोमिनी विनोद कोइरालाले जानकारी दिए ।
चुलोसँगै यसमा प्रयोग गर्न मिल्ने भाँडा पनि वितरण गरिएको छ । वितरण गरिएका चुलो र भाँडाको मूल्य करिब ६० लाख रहेको कोइरालाले बताए ।
ग्रामीण सामुदायिक विद्युतीकरण उपभोक्ता समितिका अध्यक्ष रामहरि श्रेष्ठले प्रदूषणमुक्त समाजका लागि विद्युतीय चुलोको भरपुर उपभोग गर्न आग्रह गरे ।
रासस
