काभ्रे । काभ्रेमा नेपाली कांग्रेसको 'समुदायमा कांग्रेस' अभियान सुरु भएको छ । नेपाली कांग्रेस काभ्रेले जनताका अपेक्षा, सुझाव र गुनासो बुझ्न समुदायमा कांग्रेस अभियान लिएर गाउँ पस्ने भएको हो ।
केन्द्रीय समितिले तय गरेको अभियानको लागि नेपाली कांग्रेस काभ्रेले सबै वडामा प्रतिनिधि समेत तोकेर काभ्रेको गाउँ बस्ती र टोल जाने भएको हो । अभियानका लागि काभ्रेमा केन्द्रीय प्रतिनिधिको रूपमा केन्द्रीय सदस्य नानु बास्तोलालाई खटाइएको छ । केन्द्रीय सदस्य बास्तोलाले तीन वटै तहका जनप्रतिनिधिबारे जनताको अपेक्षा, गुनासो र सुझाव लिनको लागि कांग्रेसले अभियान चलाएको बताइन् । जनताका असीमित आवश्यकता सीमित श्रोतका कारण सम्बोधन हुन नसकेको भन्दै जनताको अधिकतम हितलाई ध्यानमा राखेर काम गर्नुपर्ने बताइन् ।
तोकिएका प्रतिनिधिले जनताको अपेक्षा, सुझाव, गुनासा, विकास र सेवा प्रवाहको अवस्था र समुदायको असल अभ्यासबारे जिल्ला पार्टीलाई प्रतिवेदन दिने नेपाली कांग्रेस काभ्रेका सभापति तीर्थ लामाले जानकारी दिए । अभियान अन्तर्गत वडाको पायक पर्ने स्थानमा आवश्यकता अनुसार १ भन्दा बढी स्थानमा वडावासीसँग खुल्ला छलफल राखी तीन वटै तहका सरकारसँगका जनताका अपेक्षा गुनासा र सुझाव सुन्नुका साथै पार्टीका बारेमा जनताका सुझाव लिइने उनले बताए। वडामा रहेका विभिन्न समूहसँग सामूहिक छलफल गरिने उनको भनाइ छ।
वडास्थित नागरिक समाज, शिक्षक, प्राध्यापकलगायत आमा समूह, युवा क्लब, कृषक समूह, स्वास्थ्य समिति, व्यवसायी समूहसँग छलफल गर्न सकिने उनले बताए । अभियान अन्तर्गत कुनै एउटा निश्चित विषयसँग सम्बन्धित व्यक्ति, सम्बन्धित सरोकारवाला समूह, प्राज्ञ, सहिद परिवार वा अरू सम्बन्धित व्यक्ति वा समूहसँग छलफल गरिने उनले बताए ।
गाउँपालिका र नगरपालिका, वडास्थित सेवा प्रवाह केन्द्र, स्वास्थ्य चौकी वा आधारभूत स्वास्थ्य सेवा केन्द्र, विद्यालय, विकास निर्माण योजना, समुदाय र निजी क्षेत्रको प्रयासमा भएका कामहरू लगायतको अवलोकन गरी सेवा प्रवाहको अवस्था बुझ्ने र समस्या सुन्ने कार्यक्रम अभियान अन्तर्गत रहने छ । शिक्षा, स्वास्थ्य, कृषि, रोजगारी, उद्यमशिलता लगायतमा नागरिकले गरेका प्रयास र सफलताका कथा खोज्ने सुन्ने अवलोकन र संवाद गर्ने, वडा कार्यालयबाट हुने सेवा प्रवाहको अवस्था, समस्याका बारेमा सेवाग्राहीसँग संवाद तथा अन्तरक्रिया छलफल गर्ने कार्यक्रम गरिने छ ।
