पोखरा । भारतीय टिम दिल्ली फुटबल क्लबले अन्तिम समयमा आफ्नो सहभागिता रद्ध गरेको छ । आयोजक सहारा क्लब पोखरालाई पत्र पठाउँदै प्रतियोगितामा सहभागी हुन नसकेकोमा क्षमा मागेको हो ।
भारतीय टिमले क्यान्सिल गरेपछि विभागीय सशस्त्र प्रहरीको एपिएफ प्रतियोगितामा समेटिएको छ । मंगलबारदेखि हुने प्रतियोगितामा १२ टिम सहभागी हुनेछन् ।
डिफेण्डिङ च्याम्पियन सङ्कटासँगै नेपाल पुलिस, त्रिभुवन आर्मी, मनाङ मर्स्याङ्दी, मछिन्द्रले प्रतिस्पर्धा गर्नेछ । यस्तै, चर्च ब्वाइज, एपिएफ, जावलाखेल, राइजिङ स्टार, थ्री स्टार र आयोजक सहारा सहभागी हुनेछ । भुटानको पारो फुटबल क्लबले विदेशी टिमको प्रतिनिधित्व गर्ने क्लबका महासचिव रामजीप्रसाद अधिकारीले जानकारी दिए ।
प्रतियोगिताको विजेता टिमले १२ लाख १ हजार र उपविजेताले ६ लाख १ हजार पुरस्कार जित्नेछन् । २२ औँ संस्करणमा पनि सोही पुरस्कार थियो । यस्तै, सहभागी प्रत्येक टिमलाई प्रत्येक खेलको २० हजार र क्वाटर खेल्नेलाई ३० हजार तथा सेमिफाइनल खेल्नेलाई ५० हजार उपलब्ध गराइने आयोजकले जनाएको छ ।
क्लबले फुटबल टुर्नामेण्टबाट एकेडेमी चलाउँदै आएको छ । एकेडेमीमा ८ जिल्लाका १४ बालकहरू आश्रित छन् । २३ औँ प्रतियोगिता माघ ९ गतेदेखि २० गतेसम्म पोखरा रङ्गशालामा हुने अध्यक्ष केशवराज बरालले जानकारी दिए । प्रतियोगिता सञ्चालनमा उद्योगपति तथा पूर्व सांसद स्व.सूर्यबहादुर केसीको परिवारले साथ दिएको छ । उत्कृष्ट ५ पुरस्कार उनैको स्मृतिमा प्रायोजन गरिएको आयोजकले जनाएको छ ।
प्रतियोगितालाई पोखरा महानगरले कार्यपालिकाबाटै निर्णय गरेर संरक्षकत्व दिएको छ । सहाराले विभिन्न देशमा शाखा खोलेको छ । उनीहरूकै सहयोगबाट प्रतियोगिता चल्दै आएको छ । एन्फाले प्रतियोगिता चलाउन मैदान निःशुल्क दिएको छ ।
