काठमाडौं । इण्डियन आइडलको आउँदो एपिसोड रोचक हुने देखिएको छ । गायक उदितनारायण झा विशेष अतिथि बनेर आउँदैछन् । यो सप्ताहन्त नै उदितनारायण विशेष हुँदैछ ।
प्रतिस्पर्धीले उदितको गीतमा एक से एक शानदार प्रस्तुति दिएका छन् । नेपालकी मेनुका पौडेलले उदितको गीत ‘साइनाथ’ गाइन् । उनको उत्कृष्ट प्रस्तुतिमा प्रभावित भएका उदितले साइबाबाको मूर्ति मेनुकालाई उपहार दिए ।
मेनुकासँगै उदितले आइडलको मञ्चमा गीत गाए । त्यसपछि उनले मेनुकालाई अँगालो हाले र उनको प्रशंसा गरे । त्यसपछि उनलाई साइबाबाको मूर्ति दिए ।
क्रिसमस स्पेसल रहेको उक्त एपिसोडमा उदित सान्ताको हुलियामा स्टेजमा पुगेका थिए । जहाँ उनले सबैजनालाई गुलाफको फूल बाँडे ।
सोनी इन्टरटेनमेन्ट टेलिभिजनले आगामी एपिसोडको टिजर सार्वजनिक गर्दै मेनुका र उदितको प्रस्तुतिलाई ‘डिभाइन पर्फमेन्स’ भन्दै सेयर गरेको छ । आइडलको सिजन १४ मा मेनुकाले सुरुदेखि नै शानदार प्रस्तुति दिएकी छन् । दुई साताअघि उनले ‘सलार’ फिल्ममा गीत गाएर भारतीय पार्श्वगायनमा डेब्यु समेत गरिन् ।
