एजेन्सी \ बेइजिङ । तालिबान सरकारले तोकेको कूटनीतिज्ञलाई चीनले अफगानिस्तानका लागि राजदूतको हैसियत दिएको छ । यस्तो गर्ने चीन पहिलो देश हो।
चीनले तालिबानलाई वैध सरकारको आधिकारिक दर्जा दिइसकेको छ। चिनियाँ विदेश मन्त्रालयकी प्रवक्ता वाङ वेनबिनलाई मंगलबार पत्रकार सम्मेलनमा ‘चीनले तालिबानलाई अफगानिस्तानको वैध सरकारको रूपमा मान्यता दिएको हो ?’ सोधिएको थियो । यस प्रश्नको जवाफमा उनले भने, ‘अफगानिस्तानलाई अन्तर्राष्ट्रिय समुदायबाट बाहिर निकाल्नु हुँदैन भन्नेमा चीन विश्वास गर्छ ।’
यसअघि पनि तालिवानका उम्मेदवार बिलाल करीमीलाई चीनले राजदूतको हैसियत दिएको खबर बाहिर आएको थियो । जब अगस्ट २०२१ मा अमेरिकी सेना फिर्ता भयो र तालिबान फेरि सत्तामा आयो, काबुलमा आफ्नो दूतावास कायम राख्ने पाकिस्तान र रुससँगै चीन तेस्रो देश थियो ।
भर्खरै भारतमा अफगानिस्तानको दूतावास बन्द गरिएको थियो । यी दूतावासहरूले तालिबान शासित इस्लामिक इमिरेट्स नभएर अफगानिस्तानको इस्लामिक गणतन्त्रको प्रतिनिधित्व गर्दथे । त्यसपछि तालिबान सरकारले नयाँ दूतावास खोल्ने इच्छा व्यक्त गरेको थियो ।
