काठमाडौं । मिस अर्थको उपाधिका लागि नेपालसहित संसारका ८८ मुलुकका सुन्दरी भियतनामको होचिमिन्ह सहरमा भेला भएका छन् । वातावरण संरक्षणको आधारभूत थिम रहेको यो ब्युटी पेजेन्टको प्रारम्भिक प्रतिस्पर्धा आइतबारदेखि सुरु भएको छ ।
त्यहाँको साइगोन प्रदर्शनी केन्द्रको भव्य हलमा डिसेम्बर २२ मा फिनाले हुँदैछ । नेपालबाट मिस नेपाल अर्थ २०२२ रेना मजगैयाँले सहभागिता जनाएकी छन् । यूएईको दुबईमा राष्ट्रसंघीय जलवायु सम्मेलन (कोप २८)को समयमा सुरु भएको मिस अर्थलाई अर्को भाषामा वातावरण सुन्दरी पनि भनिन्छ ।
साइगोनको ओपेरा हाउसअघि आइतबार प्रतिस्पर्धी सुन्दरीले आफ्नो थिम्याटिक पहिरन प्रस्तुत गरे । लङ गाउन कम्पिटिसन नाम दिएको उक्त प्रतिस्पर्धामा रेनाले नीलो गाउन लगाएर प्रस्तुति दिएकी थिइन् ।
फेसन डिजाइनर तेन्जिङ छेतेन भुटियाले डिजाइन गरेको उक्त नीलो पहिरनले जीवनको अन्तिम गन्त्व्यमा पुग्न प्रेरणा दिन्छ । सो पहिरनमा रेना आकर्षक देखिएकी थिइन् ।
रेनाको उक्त भिडियो सामाजिक सञ्जालमा सेयर भएको छ, जहाँ मिस नेपाल वर्ल्ड-२०२३ सृच्छा प्रधानदेखि अभिनेत्री सुरक्षा पन्तसम्मले उक्त पहिरनको प्रशंसा गरेका छन् । सुरक्षाले पनि कान्स फिल्म फेस्टिभलमा तेन्जिङकै डिजाइनमा रेडकार्पेट प्रिमियर नापेकी थिइन् ।
मिस अर्थमा रेनाले यसपटक नेपालको जलवायु संकटको मुद्दा प्रस्तुत गर्दैछिन् । २३ औं संस्करणको यो मिस अर्थको नारा ‘म रुखलाई प्रेम गर्छु’ रहेको छ ।
