काठमाडौं । भोजपुरी स्टार खेसारीलाल यादवले नेपालका विभिन्न ठाउँमा आगामी फिल्म ‘निरहुवा हाजिर हो’को छायांकन गरेका छन् । फिल्मका चार गीतको सुटिङपछि उनी पटना फर्किएका छन् ।
पाँच दिनसम्म नेपालमा सुटिङ गरेर खेसारीलालसहितको टोली फर्किएको हो । सप्पु नामले चर्चित अभिनेत्री शकुन्तला पनि आएकी थिइन् । एक गीतमा खेसारीलालले नेपाली मोडल उषा उप्रेतीसँग अभिनय गरेको जनाइएको छ ।
फिल्मका नेपाली निर्माण व्यवस्थापक सुवास काफ्लेका अनुसार स्वयम्भू, भक्तपुर दरबार क्षेत्र, साँगा महादेव, नगरकोट र राजधानीको एक डिस्कोमा छायांकन भएको हो । नेपालमा समेत खेसारीलालको ठूलो फ्यान फलोइङ छ ।
दुई वर्षअघि सुनसरीमा खेसारीलाललाई प्रमुख अतिथि बनाएर आयोजना गरिएको कार्यक्रममा गाडीसहित उपकरणहरु तोडफोड भएका थिए । भारतको बिहारसहित नेपालको मधेश प्रदेशमा खेसारीलालको क्रेज लोभलाग्दो छ ।
