बारानकास । अपहरणमा परेका कोलम्बियन खेलाडी लुइस डियाजका पितालाई गुरिल्लाहरुले १३ दिनपछि रिहा गरेका छन् । लिभरपुलका फरवार्डका पिता लुइस म्यानुएल डियाजलाई नेसनल लिबरेसन आर्मी (एलईएन) ले संयुक्त राष्ट्रसंघ र क्याथोलिक चर्चका अधिकारीहरुलाई हस्तान्तरण गरिएको हो ।
उनलाई गत अक्टोबर २८ मा बरानकासबाट अपहरण गरिएको थियो । उनीसँग उनकी पत्नीलाई पनि अपहरण गरिएको भए पनि तिनलाई भने केही घण्टापछि नै रिहा गरिएको थियो ।
स्थानीय मिडियाका अनुसार रिहा पछि म्यानुएललाई सेनाको हेलिकप्टरबाट भालेडुपार लगिएको थियो । त्यहाँ उनको स्वास्थ्य परीक्षणपछि परिवारलाई हस्तान्तरण गरिएको छ । अधिकारीहरूले उनको स्वास्थ्य अवस्था राम्रो रहेको र यातनाको कुनै पनि सङ्केत नदेखिएको बताएका छन् ।
स्थानीय पत्रिकाका अनुसार स्थानीयहरूले लुइस डियाजले लगाउने लिभरपुलको २३ नम्बरको जर्सी लगाएर उनको स्वागत गरेका थिए । लिभरपुलका म्यानेजर योर्गन क्लपले उनको रिहाइप्रति खुसी व्यक्त गरेका छन् ।
