एजेन्सी - इजरायल र प्यालेस्टिनी लडाकु समूह ‘हमास’ बिचको युद्धका सम्बन्धमा अन्तर्राष्ट्रिय जगतले प्रतिक्रिया जनाइरहेको छ ।
यसै क्रममा चीनले इजरायल र प्यालेस्टाइनबिच भइरहेको संघर्षबाट आफू चिन्तित रहेको जनाएको छ । दुवै तर्फबाट भएको आक्रमणमा ठुलो संख्यामा आमनागरिक मारिएको भन्दै चीनले दुःख व्यक्त गरेको छ । चीनले आमनागरिकमाथि भइरहेको हिंसाको विरोध गरेको छ । जारी युद्ध चाँडै अन्त्य हुने र शान्ति बहाल हुनेमा आफू आशावादी रहेको पनि चीनले जनाएको छ ।
यस्तै, रुसले पनि गाजा क्षेत्र र इजरायलमा भएको हिंसाको निन्दा गरेको छ । रुसले इजरायल–हमासबिचको युद्धलाई लिएर दिएको प्रतिक्रिया ‘विनाशकारी’ भएको पनि जनाएको छ ।
रुसका विदेशमन्त्री सर्गेइ लाभरोभले भनेका छन्, ‘इजरायलमाथि भएको हमलाको मात्र निन्दा गर्नु पश्चिमी मुलुकको अदुरदर्शिता हो, उनीहरुलाई प्यालेस्टाइनको समस्या समाधान नगरी इजरायलको जित हुन्छ भन्ने लागेको छ ।’
