काठमाडौँ । लोकप्रिय हास्यकलाकार मदनकृष्ण श्रेष्ठको आज ७४औं जन्मदिन परेको छ । आज परेको जन्मदिन उनी विभिन्न कार्यक्रममा सहभागी भएर मनाइरहेका छन् ।
सामाजिक सञ्जालमा बिहानैदेखि उनलाई जन्मदिनको शुभकामनाको ओहिरो लागेको छ । कतिपयले त फोन नै गरेर जन्मदिनको शुभकामना दिएका छन् ।
श्रेष्ठलाई नेपाली हास्यव्यङ्ग्य क्षेत्रको एक खम्बाका मानिन्छ । श्रेष्ठको जन्मदिन पारेर आइतबार ललितपुरको पाटन दरबार क्षेत्र मंगलबाजारमा एक रक्तदान कार्यक्रम समेत आयोजना गरिएको छ ।
ललितपुर महानगरपालिका, नेपाल अर्वुद रोग निवारण संस्था ललितपुर र रोटरी क्लबको आयोजना रहेको कार्यक्रममा कलाकार श्रेष्ठ पनि सहभागी थिए । कार्यक्रममा श्रेष्ठले रक्तदातालाई रक्तदान प्रमाण पत्र समेत वितरण गरे ।
श्रेष्ठको अभिनयमा हरिवंश आचार्यसँगको जोडी लामो समयदेखि जम्दै आएको छ । दुवैको जोडीलाई नेपाली कलाक्षेत्रमा ‘महजोडी’ भन्ने गरिन्छ । रंगमञ्च, टेलिभिजनदेखि ठुलोपर्दासम्ममा छाउन सफल श्रेष्ठ थुप्रै कलाकारको प्रेरणाको श्रोत पनि हुन् । श्रेष्ठले गतबर्षको जन्मदिनमा आफ्नो स्वर रहेको एक गीत ‘एउटा सपना छ’ सार्वजनिक गरेका थिए ।
आज पनि उनको जन्मदिनमा परेर बिभिन्न कार्यक्रम आयोजना हुँदैछ । जसमा उनी सहभागी भएर केक समेत काट्टे कार्यक्रम रहेको छ ।
