काठमाडौं - विश्वका धनीहरुको सूची प्रकाशन गर्ने चर्चित म्यागेजिन फोर्ब्स म्यागजिनका अनुसार नेपालका उद्योगपति विनोद चौधरीको सम्पत्ति एक वर्षमा ३० करोड डलरले बढेको छ ।
चौधरीको सम्पत्ति हाल एक अर्ब ८० करोड डलर पुगेको छ । सन् २०२२ मा उनको सम्पत्ति एक अर्ब ५० करोड डलर थियो । फोर्ब्सको सूची अनुसार चौधरी संसारका १६४७ औं धनी व्यक्ति हुन् । उनी नेपालका एक्ला अर्बपति हुन् ।
सन् २०१४ मा उनी अर्बपति सूचीमा प्रवेश गरेका थिए। त्यतिबेला उनको सम्पत्ति १.१ अर्ब डलर थियो। फोर्ब्सले सार्वजनिक गरेको यो सम्पत्ति उनी विश्व अर्बपति वरीयतामा परेयताकै सबैभन्दा धेरै हो।
नेपाली कांग्रेसका केन्द्रीय सदस्य चौधरी गत मंसिर ४ मा भएको प्रतिनिधि सभा निर्वाचनमा नवलपरासी (बर्दघाट पश्चिम) बाट निर्वाचित भएका थिए ।
