१६ भदौं , काठमाडौँ । सरकारले कोरोना भाइरस संक्रमण रोकथाम, नियन्त्रणमा सांसदहरूलाई पनि भूमिका दिएको छ ।
१४ गते आइतबार बसेको मन्त्रिपरिषद्को बैठकले प्रत्येक निर्वाचन क्षेत्रमा प्रत्यक्ष निर्वाचित संघीय सांसदको संयोजकत्वमा समिति गठन गर्दै सांसदहरुलाई कोरोना रोकथाम र नियन्त्रणमा जोडेको हो ।
सरकारका प्रवक्ता एवं अर्थ, सञ्चार तथा सूचना प्रविधिमन्त्री युवराज खतिवडाले सञ्चार तथा सूचना प्रविधि मन्त्रालय सिहदरबारमा मन्त्रिपरिषद् बैठकका निर्णय सार्वजनिक गर्दै सरकारले सांसदहरुलाई कोरोना रोकथाममा जोडेको हो ।
प्रवक्ता डा. खतिवडाले कोरोनाको रोकथाम, नियन्त्रण एवं संक्रमितको उपचारमा सांसदहरूको भूमिकालाई स्पष्ट पार्न सरकारले यस्तो निर्णय गरेको जानकारी दिए ।
उनले भने, ‘जनप्रतिनिधिहरूलाई कोभिड नियन्त्रणमा खटाउने, भूमिका दिनेबारे सरकारले निर्णय गरेको छ । त्यसका लागि प्रत्येक निर्वाचन क्षेत्रका प्रतिनिधिसभाका प्रत्यक्ष निर्वाचित सांसदको नेतृत्वमा सो क्षेत्रका समानुपातिक सांसद र राष्ट्रिय सभाका सदस्यहरूलाई जनप्रतिनिधिको हैसियतले कोभिडको रोकथाम, नियन्त्रण र उपचारको व्यवस्थाको लागि आवश्यक समन्वय र अनुगमन गर्न अनुरोध गर्ने निर्णय भएको छ ।’
यस अघि सांसदहरुले कोरोना संक्रमण रोकथाम, नियन्त्रण तथा संक्रमितको उपचारमा भूमिका नभएको गुनासो गर्दै आएका थिए ।
सरकारले वैदेशिक रोजगारीका जुन देशले कामदारहरूलाई खुला गर्छ सोहि देशका श्रम इजाजत खोल्दै जाने निर्णय गरेको छ । त्यस्तै सरकारले शैक्षिक संस्था र लामो दूरीका यातायात भदौ मसान्तसम्म बन्द गर्ने निर्णय गरेको छ ।
भदौ १४ गते साँझ बसेको मन्त्रिपरिषद् बैठकले यस्तो निर्णय लिएको हो । देशमा कोरोना भाइरसबाट संक्रमित तीव्र गतिमा बढिरहेकाले सरकारले शैक्षिक संस्था र लामो दूरीका यातायात भदौ मसान्तसम्म बन्द नै राख्ने निर्णय गरेको एक मन्त्रीले जानकारी दिएका छन् ।
त्यसैगरी सरकारले आन्तरिक हवाई उडान पनि भदौ मसान्तसम्म नै नखोल्ने निर्णय गरेको छ । हवाई कम्पनीहरुले उडान सञ्चालनको पूर्वतयारी गरिरहँदा सरकारले भने भदौ १५ सम्म रहेको उडान स्थगनलाई बढाएर मसान्तसम्म पुर्याएको हो ।
साउन ७ गते लकडाउन खुलेसँगै सरकारले शैक्षिक संस्था खुलाउने तयारीस्वरुप सरकारी शिक्षकहरुलाई विद्यालयमा हाजिर हुन भनेको थियो । अहिलेको यो निर्णयपछि अब विद्यालय भदौ मसान्तसम्म नखुल्ने भएका हुन् । लकडाउन हटेपनि अहिले देशभरका करिब ५० जिल्लामा निषेधाज्ञा जारी भएको छ ।
