२५ जेठ, काठमाडौं । जनता समाजवादी पार्टी (जसपा) मा पाँच पदाधिकारी रहने टुंगो लागेको छ भने पार्टीमा पहिलो वरियताको अध्यक्षमा डा. बाबुराम भट्टराई चयन भएका छन । भट्टराईले पार्टीमा पहिलो वरियतासहित संघीय षरिषदको नेतृत्व गर्ने भएका छन  ।

जसमा तीन जना अध्यक्ष रहने छन् ।डा. बाबुराम भट्टराई,महन्थ ठाकुर, उपेन्द्र यादव क्रमश: अध्यक्ष रहने निर्णय भएको स्रोतले जानकारी दिएको छ ।

समाजवादी पार्टी र राष्ट्रिय जनता पार्टीका शीर्ष नेताहरुबीच शनिबार अबेलासम्म र आइतबार बिहानदेखि भएको छलफलले यस्तो निर्णय गरेको हो । पार्टीको दोस्रो र तेस्रो वरियतासहित केन्द्रीय समितिको नेतृत्व क्रमशः महन्त ठाकुर र उपेन्द्र यादवले गर्नेछन् यस्तै वरिष्ठ नेताद्वय राजेन्द्र महतो र अशोक राई पनि पदाधिकारी रहने छन् । बाँकी सबैको नाम मात्रै पठाइने भएको छ ।

जसपा नेताहरू दल दर्ताका लागि आजै निर्वाचन आयोग जाँदैछन् । १० बैशाखमा समाजवादी पार्टी (सपा) र राष्ट्रिय जनता पार्टी (राजपा)बीच भएको एकीकरण सहमतिअनुसार आयोगमा निवेदन दर्ता गर्न जान लागेको समाजवादी पार्टीका एक नेताले जानकारी दिए ।

राजनीतिक दल सम्बन्धी ऐनमा एकीकरण वा गाभिने घोषणा गरेको ४५ दिनभित्र सम्झौताको प्रतिलिपी संलग्न गरेर निर्वाचन आयोगमा निवेदन दिनुपर्ने व्यवस्था छ । जसपाले सम्झौता गरेको शनिबार ४५ दिन पुगेको थियो ।