७ जेठ, काठमाडौं । बंगालको खाडीमा विकसित शक्तिशाली चक्रवात अम्पुनको अप्रत्यक्ष प्रभाव नेपालमा कम्तिमा तीन दिनसम्म पर्ने भएको छ ।
शक्तिशाली चक्रवात अम्पुन भारत पश्चिम बंगालको राजधानी कोलकातामा स्थानीय समयअनुसार दिउँसो पौने ३ बजेतिर जमिनमा ठोक्किएको थियो । जसको कारण पश्चिम बंगालका साथै ओडिसा लगायतका क्षेत्रमा तीव्र वेगको आँधी र भारी वर्षा भइरहेको छ । हुरीबताससँगैको वर्षाको कारण कम्तिमा तीन जनाको ज्यान गइसकेको छ । पूर्वसतर्कताअनुसार भारतको केन्द्र सरकार ओडिसा सरकारले आपतकालीन उद्धार टोली परिचालन गरेका थिए । उनीहरुले करिब सात लाख व्यक्तिलाई सुरक्षित स्थानमा सारेका छन् ।
यसैगरि अम्पुनको अप्रत्यक्ष प्रभावले नेपालमा गण्डकी प्रदेशदेखि पूर्वको भूभागमा बदली भई केही स्थानमा पानीसमेत परिरहेको जल तथा मौसम विज्ञान विभागले जनाएको छ ।