बुटवल । लुम्बिनी प्रदेशले पहिलो पटक आफ्नै प्रदेशवासी प्रदेश प्रमुख पाएको छ । रोल्पा माडी गाउँपालिका–२ घर्ती गाउँका कृष्णबहादुर घर्ती मगरले लुम्बिनी प्रदेश प्रमुखको रूपमा शुक्रबार पदभार ग्रहण गरेका छन् ।
योसँगै लुम्बिनी प्रदेशले पहिलो पटक आफ्नै प्रदेशवासीलाई प्रदेश प्रमुखको रूपमा पाएको छ । यसअघिका लुम्बिनी प्रदेश प्रमुख अन्य प्रदेशबाट आएका थिए ।
सरकारले लुम्बिनी प्रदेशमा उमाकान्त झा, धर्मनाथ यादव, अमिक शेरचनलाई प्रदेश प्रमुखको रूपमा पठाएको थियो । पूर्वसचिव समेत रहेका झा मधेस प्रदेश निवासी हुन् । यादव मधेस प्रदेशको सिराहा जिल्ला निवासी हुन् भने शेरचन बागमती प्रदेशवासी हुन् । अहिले सरकारले लुम्बिनी प्रदेशवासी घर्ती मगरलाई प्रदेश प्रमुख बनाएपछि आफूहरू खुसी भएको रोल्पाका कांग्रेसका नेता मानबहादुर खत्रीले रातोपाटीलाई बताए । खत्रीले आफ्नो ठाउँको व्यक्तिलाई सरकारले प्रदेश प्रमुख बनाउँदा प्रदेशको हित र प्रदेशवासीप्रति भावनात्मक सम्बन्ध रहने बताए ।
यस्तै दाङका अधिकारकर्मी सुशील बस्नेतले संघीयता लागू भएको ७ वर्षमा पहिलो पटक आफ्नो प्रदेशवासीलाई प्रमुखको रूपमा पाउनु खुसीको विषय भएको बताए । लुम्बिनी प्रदेशमा ७ वर्षमा ४ जना प्रदेश प्रमुख भएका छन् ।
