काठमाडौँ । सत्तारूढ दल नेकपा (माओवादी केन्द्र) को केन्द्रीय समिति बैठक व्यवस्थापनमा २१ लाख १५ हजार ५०० रुपैयाँ खर्च भएको छ । राजधानीको प्रज्ञा भवन कमलादीमा साउन (१७–२१) सम्म बसेको बैठक व्यवस्थापनका लागि उक्त रकम खर्च भएको केन्द्रीय कार्यालय सचिव डोरप्रसाद उपाध्यायले जानकारी दिए ।
सो आम्दानी केन्द्रीय सदस्यहरूबाट आएका प्रवेश शुल्क, लेबी लगायतबाट असुल गरिएको उनले बताए । सचिव उपाध्यायका अनुसार आम्दानी १७ लाख ४६ हजार २०० भएको छ । अपुग ३ लाख ६९ हजार ३०० पार्टीको केन्द्रीय कोषबाट व्यहोर्ने उपाध्यायले जानकारी दिए ।
कुल खर्चमध्ये हल भाडा ११ लाख ४ हजार भएको छ । बाँकी खाजा, झन्डा, ब्यानर, स्टेस्नरी, प्रवेश पास, परिचयपत्र, खाजापानी, खानामा खर्च भएको छ ।
‘पाँच दिनसम्म बसेको बैठक भाडा, रासनपानी, मञ्च व्यवस्थापनमा खर्च भएको छ’, उनले भने, ‘बाँकी रकम केन्द्रीय कार्यालयको कोषबाट व्यर्होछ ।’ योपटक माओवादीले बैठकमा प्रवेश गर्ने प्रत्येक केन्द्रीय सदस्यबाट रु. ५०० उठाएको थियो । खाना र बस्न उनीहरूले आफै व्यवस्थापन गरेका थिए ।
