कात्तिक १९,
'चिनको ईशारामा नेपाल लिपुलेक आफ्नो दावी गर्दैछ' भनेर टिप्पणी गर्ने भारतीय स्थलसेनाध्यक्ष जनरल मनोज मुकुन्द नरावणे तीनदिने औपचारिक भ्रमणका क्रममा आज नेपाल आउँदै छन् । कोरोना भाइरसका कारण उनी नेपाल आउने यसअघिको पूर्वनिर्धारित कार्यक्रम रद्ध भएकोमा पुनः नयाँ मिति तय भएको हो । नेपाल र भारतबीच सम्बन्धमा चिसोपन आइरहेका बेला भारतीय सेनाध्यक्षको तीनदिने औपचारिक भ्रमण हुने भएको छ ।
प्रधानसेनापति पूर्णचन्द्र थापाको औपचारिक निमन्त्रणामा नेपाल आउन लाग्नुभएका भारतीय स्थल सेनाध्यक्ष नरावणेलाई राष्ट्रपति विद्यादेवी भण्डारीले नेपाली सेनाको मानार्थ महारथीको दज्र्यानी चिह्न प्रदान गर्ने कार्यक्रम रहेको छ ।
भारतमा नियुक्त हुने नयाँ स्थल सेनाध्यक्षलाई नेपाली सेनाको मानार्थ महारथी र नेपाली सेनाको नयाँ प्रधानसेनापतिमा नियुक्त भएपछि भारतीय स्थल सेनाको मानार्थ महारथीको दज्र्यानी चिह्न प्रदान गर्ने प्रचलन रहेको छ ।
नेपालप्रति कठोर नीति अपनाउने स्थल सेनाध्यक्ष नरावणेले शुरुमा नेपाल आउन आनाकानी गर्दै आउनुभएको थियो । सेनाध्यक्ष नरावणे आज बुधबार आफ्नै विशेष विमानबाट काठमाडौं आउन लाग्नुभएको हो । भारतीय गुप्तचर निकाय रअका प्रमुख सामन्तकुमार गोयलको भ्रमणका बारेमा विभिन्न टीकाटिप्पणी भइरहेका बेला नरावणेको नेपालमा औपचारिक भ्रमण हुन लागेको हो ।
यि तिनै नेपाल बिरोधी भारतिय जनरल हुन् जसले, भारतले एकतर्फी रुपमा नेपालको सिमाक्षेत्रमा पर्ने लिपुलेक हुँदै कैलाश मानसरोवर जाने बाटो खनेको चौतर्फी बिरोध हुँदा भनेका थिए, "लिपुलेक सडकका सन्दर्भमा म कत्ति पनि विरोधाभास देख्दिनँ । कालीनदीभन्दा पश्चिममा हामीले सडक बनाएका छौँ । नेपालमा यसको किन विरोध भइरहेको छ, म जान्दिनँ । उनीहरूले यो विषय कसैका लागि उठाएका हुन्, यो सम्भावना म देख्छु । यो सडक करिडोरबारे विवाद छैन ।"
